„ჩემი ცოლის დაქალების“ რეიტინგმა პიკს მიაღწია. მგონი, საქართველოში ოჯახი არ დარჩა, ამ სერიალის გმირების ცხოვრებით რომ არ ინტერესდებოდეს. განსაკუთრებული ინტერესი ბოლო დროს მოღალატე დათო გოცირიძის ოჯახის მიმართ გაჩნდა. მისი და კბილის ექიმი ნათიას რომანი იმდენად მიუღებელი აღმოჩნდა მაყურებლისთვის, თურმე კლინიკას, რომელშიც დათომ ნათია გაიცნო, საპროტესტო პლაკატებით აჭრელებენ. ამასობაში ქალაქში ხმა გავრცელდა, მსახიობი ლევან ყოჩიაშვილი მართლაც გაშორდა ცოლსო. ეს ამბავი მსახიობთან გადავამოწმეთ.
-
- კი, მართალია, კლინიკის თანამშრომლებმა მორიგ გადაღებაზე მისულებს გვითხრეს, „ძუძუებს ნუ გაცვლი ოჯახზეო“ - მე მომმართავდნენ თურმე. ნინოს უფრო ერჩიან, ის არის ოჯახის დამანგრეველიო, ამბობენ. ქუჩაში გაჩეჩვით ემუქრებიან (იცინის). რამე თუ არ მოვიფიქრეთ, არ ვიცი, რა გვეშველება.
- ინტერნეტში გვერდიც გახსნილა დავით გოცირიძის ოჯახის გადასარჩენად. ამბობენ, თუ საკმარის „ლაიქებს“ დააგროვებს, სცენარისტები სცენარს შეცვლიანო...
- არ ვიცი, წინასწარ ვერაფერს ვიტყვი. ამ შაბათ-კვირას გაირკვევა ყველაფერი. ჯერ არ ვიცი, ვუღალატებ თუ არა ცოლს. ჯერ იტანჯება ის საცოდავი, ხომ ნახეთ, რა დღეშია, როგორ წვალობს.
- ამასობაში ქალაქში ხმა გავრცელდა, რომ ლევან ყოჩიაშვილი ცოლს გაშორდა...
- არა, არა, ვიცი რატომაც გაჩნდა ეგ ჭორი, გადამეტებული სათაური იყო, რომ ვითომ ჩემი პირადი ცხოვრება სერიალის გმირის ცხოვრებას დაემსგავსა. მინდა დავამშვიდო ყველა, კარგად ვართ, ერთად ვართ და მშვიდად ვართ.
ჟურნალი „რეიტინგი“