* 2008 წელს რომან აბრამოვიჩმა თავის საყვარელ დაშა ჟუკოვას მთვარეზე საკმაოდ სოლიდურ თანხად 40 ჰექტარი მიწა შეუძინა. ალბათ, დაშა ბედნიერია, რომ მთვარეზე ნაკვეთის პატრონია.
* 2003 წელს ცნობილმა მომღერალმა ბონომ თვითმფრინავის ბილეთი იყიდა თავისი... შლაპისთვის. იტალიაში კონცერტზე გამგზავრებულმა აღმოაჩინა, რომ საყვარელი თავსაბურავი სახლში დარჩენოდა. ამ პრობლემის აღმოსაფხვრელად მომღერალმა 1800 დოლარი არ დაინანა, რათა მის შლაპას ლონდონიდან ბოლონიაში პირველი კლასით ემგზავრა.
* პოპულარულმა მსახიობმა ჩარლი შინმა ელიტური სათამაშოების მაღაზიაში მაგიდის ფეხბურთი 25 ათას დოლარად იყიდა - მასზე ფეხბურთელების ნაცვლად ბარბის თოჯინების ფიგურებია. ალბათ, ამიტომ არ დაიშურა ჩარლიმ ფული.
* 2011 წელს სათამაშო ბიზნესის მაგნატმა სტენლი ჰომ მსოფლიო უაზრო შენაძენით გააოგნა - 330 ათასი დოლარი გადაიხადა ორ თეთრ ტრიუფელში, რომლებიც სიძველის გამო საკვებად სრულიად გამოუყენებელი გახლდათ. როცა ჰკითხეს, რაში უნდა გამოეყენებინა ეს სოკოები, გამოაცხადა: „ზურგი უნდა მოვიფხანო“.
* 2011 წელს ჯონ ლენონის კბილი 31,2 ათას დოლარად გაიყიდა - ის კანადელმა სტომატოლოგმა მიხაილ ჟუკმა შეიძინა.
* ამერიკელმა მდიდარმა ქალბატონმა შეილა ჰირშიმ 250 ათასი დოლარი მკერდის გაზრდაში გადაიხადა. თითოეულ მხარეს დაახლოებით 2,6 ლიტრი სილიკონი „ჩაასხეს“.
* 2012 წლის თებერვალში ჩინელმა მაგნატმა ხუ ჩჟენ იუმ რეკორდული თანხა - 328 ათასი დოლარი გადაიხადა დოლჩე ვიტას ჯიშის მტრედში. მტრედების მოყვარულმა კიდევ ორი წლის წინ ამ ჯიშის სხვა მტრედში 200 ათასი დოლარი „გაისროლა“.
* 2011 წლის სექტემბერში ისტორიაში ყველაზე ძვირად ღირებული ცეცხლსასროლი იარაღი გაიყიდა - რევოლვერი კოლტი 977,5 ათას დოლარად. როგორც აუქციონზე გაცხადდა, ის „სილიკონის ველის მაგნატმა“ შეიძინა.
* 2011 წელს ანონიმურმა მყიდველმა 4 მლნ დოლარი გადაიხადა ანდრეას გურსკის ფოტოსურათში, სახელწოდებით „რეინი-2“. ფოტო გურსკიმ 1999 წელს გადაიღო.
* 2012 წლის აპრილში აუქციონზე ანონიმმა 900 წლის იაპონური კერამიკული ფიალა 26 მლნ დოლარად დაისაკუთრა.
* ჰენრი მურის ქანდაკება, ნახევრად აბსტრაქტული ადამიანის ფიგურა, რომელიც მან 1951 წელს შექმნა, კრისტის აუქციონზე 30 მლნ დოლარად გაიყიდა.
* 1962 წლის გამოშვების „ფერარი“ 35 მლნ დოლარად გაყიდა მისმა ყოფილმა მფლობელმა, ამერიკელმა მეღვინე ერიკ ჰერემამ. ცნობისათვის, მან ზემოხსენებული მანქანა ხუთი წლით ადრე 8 მლნ დოლარად შეიძინა. ახალი მფლობელი კი მაგნატი კრეიგ მაკოუ აღმოჩნდა.
* მარკ როტკოს 1961 წელს დახატული ტილო „ნარინჯისფერი, წითელი და ყვითელი“ 86 მლნ დოლარად გაიყიდა. მისი მფლობელი, როგორც ამბობენ, რუსი ოლიგარქია.
* საუდის პრინცმა ალვალიდ ბინ ტალალმა 500 მლნ დოლარად იყიდა ორსართულიანი თვითმფრინავი, რომელშიც არის ფარეხი ორი მანქანისთვის, ცხენებისა და აქლემების საჯინიბო, ოთახი მიმინოებისთვის და სამლოცველო ადგილი. დღესდღეობით ეს ყველაზე ძვირად ღირებული კერძო თვითმფრინავია.
კესო ლაღიძე
