კონკურსში 69 წყვილი იყო თორმეტი ქვეყნიდან 21-22 მარტს თურქეთში ლათინო ამერიკულ ცეკვებში კონკურსი Gloria World Open 2015 გაიმართა, სადაც რამდენიმე ქართველი წყვილი მონაწილეობდა. მოცეკვავეები ჯერ საქართველოში არ დაბრუნებულან, ამიტომ კომენტარისთვის გიგი გაჩეჩილაძეს დავუკავშირდით.

- ძალიან ძლიერი ტურნირია, რადგან უკვე ჰყავდათ თორმეტვარსკვლავიანი წყვილი, ეს იმას ნიშნავს, რომ ნახევარფინალი დაკავებული იყო. სამწუხაროდ საქართველოს ჯერჯერობით არ ჰყავს ვარსკვლავიანი წყვილი.

- ვარსკვლავიანი წყვილი ნიშნავს, რომ ისინი მსოფლიოს საუკეთესო მოცეკვავეების ასეულში შედიან?
- ერთი ვარსკვლავი ნიშნავს, რომ საუკეთესო ასეულში შედის და ორი ვარსკვლავი კი ნიშნავს, რომ საუკეთესო 50-ში შედიან. ასეთი ძლიერი წყვილები კონკურსის პირველ ტურს ტოვებენ.

- საქართველოდან კონკურსში რამდენი წყვილი იღებდა მონაწილეობას?
- ჩვენი საუკეთესო ხუთი წყვილი იყო ამ ტურნირზე წასული. რატი გაჩეჩილაძე და მარიამ იაქაშვილი, სალომე ჭაჭუა და მაქს რიჟიკოვი, ანი ჯაჯანიძე და იაკობ ყუფუნია, ოთო ფოლადაშვილი და ჯულიანა ბარგ-ნარი და ანტონ კეშელავა და ნიკე. საკმაოდ დიდი ბრძოლა გაიმართა. 21- ე ადგილზე გავიდნენ რატი და მარიამი. მერვედფინალში გადასასვლისთვის ძალიან ცოტა დააკლდათ სალომეს და მაქსის. მათ 26-ე ადგილი დაიკავეს. ჩვენი ცეკვების ფედერაციას უკვე იმდენად კარგად აქვს საქმე, რომ რვა ძლიერი წყვილი გვყავს და ისინი შეეჯიბრებიან კავკასიის თასზე ერთმანეთს, უკვე მალე ჩატარდება საქართველოს ჩემპიონატი, სადაც ტოპ რვა წყვილში საუკეთესოს არჩევა საკმაოდ ძნელი იქნება.

- შესაძლოა, ზოგმა თქვას, რომ 21-ე ადგილი მაინცდამაინც კარგი არაა. რატი და მარიამი რამდენ წყვილს ეჯიბრებოდნენ?
- კონკურსში 69 წყვილი იყო თორმეტი ქვეყნიდან. 21-ე არაა კარგი ადგილი, მაგრამ ჩვენ დიდი ხანი არაა, რაც მსგავსი ტიპის კონკურსებში ჩავერთეთ.

- კონკურსის გამარჯვებული ვინ გახდა?
- ფრანგი წყვილი, რომელიც ახლა მსოფლიო რეიტინგით უკვე მესამე ადგილასაა.

სალომე ჭაჭუას ვნებიანი რუმბა ახალ მეწყვილესთან ერთად

ქეთი მელაძე