„მინდოდა , პრეზიდენტის პაროდიას გავაკეთებდი და მინდოდა - დამლაგებლისას“
პრეზიდენტის პაროდისტმა პრესკონფერენცია მოიწვია და სწორედ ამ ჯგუფის ლიდერთა მხრიდან მისი შევიწროებისა და დაბლოკვის ფაქტებზე ისაუბრა. მსახიობი აცხადებდა, რომ მას პრეზიდენტის პაროდიის კეთება აუკრძალეს: „არჩევნებამდე რამდენიმე თვით ადრე ვანო ჯავახიშვილმა პირად საუბარში მითხრა, რომ პრეზიდენტის პაროდია მოძველდა, ტაბუ დაედო და
პრეზიდენტის პაროდისტი ნიკა გრიგოლიას სამსახურიდან დათხოვნასაც შეეხო, თქვა, რომ ნიკას სამსახურიდან გაშვება არ აკმარეს და ფიზიკურადაც გაუსწორდნენ. ზემოთ აღნიშნულ ადამიანებს გიორგი „სექტას“ უწოდებს, ამბობს, რომ ისინი სიცილითა და იუმორით შედიან ადამიანთა სულებში და იქაურობას ანაგვიანებენ. ამავე პრესკონფერენციაზე აფციაურმა გუნდში დარჩენილ მისთვის მისაღებ მსახიობებს მიმართა და მოუწოდა, გაემიჯნონ „სექტას“. დასასრულ კი თავისი ახალი სამსახურის შესახებ გაგვიმხილა. მსახიობი სათავეში ჩაუდგა „პროფესიული კავშირების“ ახალგაზრდულ ფრთას.
- გიორგი, რატომ დუმდი აქამდე?
- მე რომ არჩევნებამდე ამ საკითხზე რამე მეთქვა, ხომ წარმოგიდგენიათ, რა კუდებს გამოაბამდნენ, რომ ფული გადამიხადეს, რომ მოღალატე ვარ. ამ ამბის პოლიტიზება არ მინდოდა.
- მაგრამ არჩევნებიდან შვიდი თვე გავიდა, დღეს რატომ გახდა აქტუალური ეს საკითხი?
- რა მნიშვნელობა აქვს, რამდენი თვე გავიდა. ერთწლიანი უმუშევრობის პერიოდი მქონდა, მეტი ფიქრის საშუალება, და გადაწყვეტილება მივიღე.
- ეს უთანხმოება ხომ ბევრად ადრე დაიწყო, შენ ჯერ კიდევ 2011 წლის დეკემბერში გამოეყავი გუნდს და მარტომ დაიწყე „თქვენი შოუს“ კეთება. რა იყო განხეთქილების მიზეზი?
- ვერ დაგეთანხმები, 2012-ში იყო ეგ ამბავი. რაც შეეხება განხეთქილებას, სწორედ სარედაქციო თავისუფლებას ვითხოვდი. ეს რომ მქონოდა, მინდოდა, პრეზიდენტის პაროდიას გავაკეთებდი და მინდოდა - დამლაგებლისას.
- თუ პრეზიდენტის პაროდიის კეთება აღარ სურდათ, რატომ აიყვანეს ქართლოს ნატროშვილი?
- ვერ გეტყვით. ალბათ იმიტომ, რომ არგუმენტი ჰქონოდათ დღევანდელი დღისთვის.
- რისი თქმა გინდა, თავის მართლებისთვის აიყვანეს ახალი პაროდისტი?
- არ ვიცი. ჩემთვის ნაკლებად მნიშვნელოვანია, დღეს რატომ ჰყავთ პრეზიდენტის პაროდისტი. ქართლოსი ნიჭიერი კაცია, კარგი ადამიანი და წარმატებებს ვუსურვებ.
- მართალია, რომ ქართლოსი შენთან სათანამშრომლოდ მოვიდა „თქვენს შოუში“ და შენ ის არ მიიღე?
- არა, ეს ტყუილია.
„დღეს ეს ადამიანები ბიძინა ივანიშვილის უკან სხედან“
იუმორისტთა გუნდის „სექტად“ მონათლულ წევრებს „რუსთავი 2“-ში ვესტუმრეთ და გაჩენილ შეკითხვებზე პასუხი ვთხოვეთ.
- ალეკო, საზოგადოების დიდ ნაწილს „კომედი ჯგუფის“ ხელმძღვანელი ვანო ჯავახიშვილი ჰგონია, რატომ? ალეკო მალხაზიშვილი:
- ეს აფციაურის დამსახურებაა ალბათ. ზოგადად ჩვენ დემოკრატიული მმართველობა გვაქვს. ერთპიროვნულად არ ვწყვეტთ მნიშვნელოვან საკითხებს.
- როგორც ვანო გადაწყვეტს, ისე იქნება ყველაფერიო, - ეს ფრაზა თქვა გიორგიმ პრესკონფერენციაზე.
- მისი ფრაზების გარჩევას არ ვაპირებ. როცა ვუყურებდი პრესკონფერენციას, ისეთი იუმორისტული იყო მისი გამოსვლა, მეგონა, ბოლოს იტყოდა, „კომედი შოუ“ იწყებაო. ტყუილი და ბოდვა იყო მისი პრესკონფერენცია. პოლიტიკური ეფერი მისცა ყველაფერს, თუმცა ამას შემდეგ რატომღაც უარყოფდა. ამბობდა, თითქოს არჩევნებამდე რამდენიმე თვით ადრე მოხდა განხეთქილება ჩვენ შორის. არადა, ზუსტად მახსოვს, 2011 წლის ნოემბრიდან აღარ არის ჩვენს გუნდში.ამის მიზეზები იყო და საშუალება უნდა მომცეთ, ცოტა ვრცლად მოვყვე. ზოგადად არ მიყვარს ჩვენს თანაგუნდელებზე აუგად საუბარი, მაგრამ რადგან სხვა გზა არ დაგვიტოვა და პრესკონფერენციაზე შეკითხვები თავად დასვა ჩვენი მისამართით, მოვყვები.
პირველ რიგში, როცა ის ამბობს,რომ „თქვენი შოუ“ მისი საავტორო პროექტი იყო, ცრულობს. მან გააკეთა „სხვა კონცერტი“, მოგვეწონა ამ კონცერტში მონაწილე ახალი თაობა და გადავწყვიტეთ, მოგვეფიქრებინა პროექტი, რომელშიც ამ ბიჭებს დავასაქმებდით. ამაში „რუსთავი 2“-ის „რუსთავი 2“-ის მაშინდელი ხელმძღვანელობაც იღებდა მონაწილეობას. თუ შეადარებთ „თქვენს შოუს“ და „სხვა კონცერტს“, აბსოლუტურად განსხვავდება ერთმანეთისგან, მაგრამ ვინაიდან ბიჭები გიორგი აფციაურის მოყვანილი იყვნენ არხზე, წასახალისებლად გადაცემის ტიტრებში ავტორის გასწვრივ გიორგი აფციაური მივუთითეთ.სხვათაშორის,იყვნენ ადამიანები, რომლებიც მეუბნებოდნენ, არ გააკეთო ეს, თავში აუვარდებაო, მაგრამ არ დავუჯერე. წავახალისეთ, გადავარჩიეთ ეს გუნდი, დავუმატეთ წამყვანები - ამიკო და ფაქო. ამაშიც გვეწინააღმდეგებოდა გიორგი, უნდოდა, კაკი და პარუნა ყოფილიყვნენ გადაცემის წამყვანები. ჩვენ ავუხსენით, რომ ამიკო და ფაქო უკვე სახეები იყვნენ და გადაცემი სრეიტინგს წაადგებოდა, მაგრამ მაინც ნაწყენი დარჩა, ყველაფერზე „ჭედავდა“. დავახმარეთ ჩვენი სცენარისტებიც და კვირაში ერთი დღე მთელი„კომედი ჯგუფი“ ამ გადაცემაზე ვმუშაობდით.
ოთხ თვეში გიორგის ამბიციებიგაუჩნდა, რომ ჩვენ ვბლოკავდით მას და შემოქმედებითი თავისუფლება უნდოდა. რას ნიშნავდა შემოქმედებითი თავისუფლება, ვერ ამიხსნა, მაგრამ მე მივხვდი, ეს იმას ნიშნავდა, როც ააფციაური სცენარს დაწერს, შენ არ უნდა ჩაერიო. ბევრი ცუდი ხუმრობა იყო, რედაქტირებას ითხოვდა, რასაც ვართე და ოთო აგვარებდნენ. ამას გამოცდილება სჭირდება, ეს კი გიორგისთვის გაუგებარი იყო. რამდენჯერმე შენიშვნა მივეცი დაგვიანებაზე. დირექტორობა მოინდომა, ბიჭებს სცენარებს აწერინბდა, საღამოს მოვიდოდა, ხუმრობებ სგადახედავდა და ეგ იყო მისი საქმე.
დამოუკიდებლობისკენ მისი სწრაფვა გაცილებით ადრე დაიწყო, საახალწლო კონცერტებზე გამოგვიცხადა, მე ჩემი ნომრით გამოვალო. ჩაკეტა თავისი მოყვანილი ბიჭები, ატარებდა თათბირებს, რომ ჩვენ ცუდები ვიყავით, რომ ამ „სასტავის“ დათრევას ვცდილობდით. საქმე იქამდე მივიდა, სტილისტი და ვიზაჟისტი მეკითხებოდნენ, ალეკო, აფციაურის ბავშვები რატომ მეკითხებიან, ხელფასი რამდენი გვაქვსო. უკვე ამომასხა. ვუთხარი, ჩვენ ერთად ვერ ვიმუშავებთ, ავიდეთ არხის გენ-დირექტორთან და რამე გადავწყვიტოთ-მეთქი. მას უკვე ამბავი ჰქონდა მიტანილი, რომ ჩვენ ვბლოკავდით, სააკაშვილის პაროდიას არ ვაკეთებინებდით. ერთი სიტყვით, მე და გენ-დირექტორმა მივიღეთ გადაწყვეტილება, გიორგი ცალკე გასულიყო ,რადგან ბიჭს უნდოდა პროდიუსერობა და მხოლოდ მიშა სააკაშვილის პაროდიიით არ კმაყოფილდებოდა. გადაცემის ბიუჯეტი და ცალკე ოთახი მივეცით და გავუშვით, გავატანეთ თავისი მოყვანილი ბიჭებიც. წავართვით მხოლოდსცენარისტები დაწამყვანები. ეს უნდოდა მას, შემოქმედებითი თავისუფლება.
- არ მოგწონდათ გიორგის გაკეთებული „თქვენი შოუ“?
- რა თქმა უნდა, არ მომწონდა. მას მერე, რაც ჩვენგან წავიდა, მკვეთრად დაეცა გადაცემის რეიტინგი დაბოლოს დაიხურა კიდეც ამ მიზეზით. დაბალრეიტინგულებს შორის მოხვდა ასევე სერიალი „ალუბლების ქუჩა“ და გადაცემა „ეთამაშე ვარსკვლავს“.
- ვანო ჯავახიშვილს რა თანამდებობა აქვს გუნდში?
- იუმორისტული დეპარტამენტის ბორდის წევრია... დაბლოკვა დაუსამართლოდ სამსახურიდან გაშვება გიორგის ოსტატობაა. როცა ცალკე გავუშვით, გუნდი და ბიუჯეტი ჩავაბარეთ, ორ კვირაში ორი თანამშრომელი, ორი უახლოესი მეგობარი ლევან კვარაცხელია და დავით ფიფია გაუშვა. შეთქმულებას მიწყობდნენო, თქვა. კიდევ ერთი იუმორისტი, გიორგი მარშანია, ერთი თვის შემდეგ ჩვენთან დაბრუნებას ცდილობდა, რაზეც აფციაურმა არხის გენ-დირექტორთან უჩივლა, გიორგი მარშანია „რუსთავი 2“-დან გააგდე, მალხაზიშვილთან მიდისო, ეუბნებოდა. მტრებად მოგვიაზრებდა, მისი ქცევები შიზოფრენიული იყო.
- მან არაერთი თქვენი ყოფილი თანაგუნდელის სამსახურიდან გაშვებისმიზეზებზე ისაუბრა.
- რაღაც არ მესმის, სხვის მაგივრად რატომ ლაპარაკობს. ყველა ჩვენს ყოფილ თანაგუნდელს იყენებს თავისი მიზნებისთვის. არადა, ყველა სხვადასხვა დროს სხვადასხვა მიზეზით წავიდა. ამიკო, ფაქო და თემო მჟავია თვითონ წავიდნენ. ნიკა გრიგოლია და სიკო ჭუმბურიძე ჩვენ გავუშვით.
- გიორგიმ მჟავიასა და ვანოს ხელფასებიც შეადარა ერთმანეთს.
- ეს სისულელეა. ჩვენ არ ვართ სახელმწიფო დაწესებულება, რომ თანამშრომლების ხელფასების ოდენობა კედელზე გამოვაკრათ. ყველა თანამშრომელს აქვს ისეთი ანაზღაურება,როგორსაც იმსახურებს.
- ნიკა გრიგოლიას ფიზიკურად გაუსწორდნენო, გიორგიმ თქვა...-
- ნიკა გრიგოლია უდისციპლინობის გამო გავუშვით სამსახურიდან. ბევრს ეს რატომღაც ვერ წარმოედგინა. გუშინ ბატონ დავით აქუბარდიას ვუსმენდი „კავკასიაზე“ დიდ პატივს ვცემ დავითს, მაგრამ გამიკვირდა,დისციპლინის გამო თანამშრომლისსამსახურიდან გაშვებარომ შეიცხადა. თუ მისი ოპერატორი არ მოვა ერთხელ, ორჯერ, სამჯერ, საინტერესოა,როგორ მოიქცევა თვითონ?! სწორედ ეს გააპროტესტა ნიკა გრიგოლიამაც, ყველასგან მაინტერესებს, რატომ გამიშვით სამსახურიდანო, ყვიროდა. ამავე შეკითხვით თავის ყოფილ ქვისლთან, ანდღულაძესთანაც მივიდა, წაებლატავა. მიშამ ვერ მოითმინა, გაარტყა, ამანაც გაიწია, ჩვენ გავაშველეთ. სულ ეს იყო, მეორე დღესვე შერიგდნენ ქვისლები.
- ალეკო, „რუსთავი 2“-ს ნაცმოძრაობასთან კეთილგანწყობაში ხშირად ამხელენ, ამბობენ, რომ ეს მოძრაობა მფარველობდა თქვენს გუნდსაც. „კომედი ჯგუფის“ კორპორატიულ საღამოზე პრეზიდენტიც კი მოვიდა. ვინ მოიწვია ქვეყნის პირველი პირი იუმორისტების საღამოზე?
- ყოველთვის ვეუბნები ჩემი გუნდის წევრებს, ნუ გაერევიან პოლიტიკაში, ნუ გახდებიან ვიღაცის სახე. იყო ასეთი ფაქტი, როცა გიგი უგულავა მერი გახდა, მის უკან კადრში ჩანდნენ ნიკა გრიგოლია, თემო მჟავია, ლევან გოგორელიანი, გიორგი აფციაური. როცა მათ ამაზე შენიშვნა მივეცი, აფციაურმა მითხრა, უკან არ დავჯექი, კადრში არ გამოვჩენილვარო. დანარჩენებმა განმიმარტეს, ეს ჩვენთვის კარგია, გამოგვადგებაო. მე უკეთ ვიცი, რა გამოგვადგება, პოლიტიკაში ნუ ერევით-მეთქი, ვუსაყვედურე. დღეს ეს ადამიანები ბიძინა ივანიშვილის უკან სხედან.
- პრეზიდენტის სტუმრობაზე გეკითხებოდი...
- ეს ჩვენი გუნდის კორპორატიული საღამო იყო, მოვიწვიეთ ჩვენი არხის დირექტორი ნიკა გვარამიაც. ორი საათის შემდეგ მოულოდნელად შემოვიდა პრეზიდენტი, პაროდისტების გაცნობა სურდა. სხვათა შორის, პირველად ვნახე პრეზიდენტი „ლაივში“.
- როგორ გაიგო, რომ თქვენი საღამო იმართებოდა და ასე უცერემონიოდ, დაუპატიჟებლად მოვიდა?
- შემდეგ კორპორატიულზე თუ ბიძინა ივანიშვილიც საკუთარი სურვილით მოვა და თავის პაროდისტს გაიცნობს, მხოლოდ გამიხარდება.
„გუნდიდან მისი ცოლის, სალიტა ჩუბინიძის გარდა, აღარავინ შემორჩა“
- ავთო, შენმა გვარმაც გაიჟღერა აფციაურის პრესკონფერენციაზე... ავთო მარგველაშვილი:
- თუ ეს პრესკონფერენცია მიეძღვნა იმას, რომ ჯავახიშვილმა დაბლოკა აფციაური, გაუშვა „კომედი ჯგუფიდან“ და შემდეგ „რუსთავი 2“-დან, ეს სწორედ აფციაურის ხელწერას ჰგავს. გიორგის დემოკრატიული ბუნებისა და ინტელექტის ნება რომ იყოს, ისეთ მგლის ბილეთს მისცემდა ყველა ადამიანს, რომელსაც ეჭვის თვალით შეხედავდა, ტელევიზიებში კი არა, დედამიწაზე, ორბიტაზე არ გააჩერებდა. ეჭვის თვალით კი ის ძალიან ბევრს უყურებს. პაროდისტი ნიკა კაკაბაძე, მას შემდეგ, რაც ჩვენთან თანამშრომლობს, „კავეენზე“ დაბლოკა აფციაურმა. ის ხომ „კავეენების“ ორგანიზატორია უნივერსიტეტში. თუ „კომედი ჯგუფში“ იქნები, აქ ვეღარ გამოხვალო, უთხრა... უნდოდა ამ ბიჭს ცალკე და არის ცალკე, ამ სიტყვის პირდაპირი მნიშვნელობით. გუნდიდან მისი ცოლის, სალიტა ჩუბინიძის გარდა, აღარავინ შემორჩა. ბიჭები, რომლებიც მასთან იყვნენ, დღეს ჩვენთან არიან და ახალი პროექტები მოაქვთ „კომედი არხზე“.
- ქორწილში დაგპატიჟათ გიორგიმ?
- კი, არჩევნების წინა დღეებში ჰქონდა ქორწილი, „სექტის“ ლიდერები მიგვიწვია - მე, მალხაზიშვილი, არაბიძე, ოთო ლომთაძე, ვასო ფხაკაძე. მივედით, ვიქეიფეთ, მივულოცეთ და წამოვედით.
- თუ ეს ყველაფერი ტყუილია, რა მიზანი ჰქონდა აფციაურს, როცა განცხადებას აკეთებდა?
- ადამიანი დარჩა მარტო, შემოეძარცვა გუნდი. აღმოჩნდა „რუსთავი 2“- ის მიღმა, არადა, მიჩვეულია პოპულარობას, ფაქტია, რომ კარგი პაროდისტია. ამასობაში ალტერნატივა გამოჩნდა, რომელიც ძალიან მოსწონს ხალხს. თავის შეხსენება უნდა, შეთავაზებები სჭირდება. ეს არის მისი მიზანი. ხმაურობს, პოპულარობა უნდა დაიბრუნოს.
„აღარ დამირეკავს და არც თვითონ შემხმიანებია“
- ქართლოს, მართლა იყავი აფციაურთან თანამშრომლობის წინადადებით?
ქართლოს ნატროშვილი:
- შარშან ჩემმა მეგობარმა გოგონამ ტელეფონით დამალაპარაკა გიორგი აფციაური. რასაკვირველია, პრეზიდენტის ხმით ვესაუბრე. გაუხარდა და გადაცემის ჩაწერაზე მიმიწვია. ჩაწერის შემდეგ ვისაუბრეთ, შემდეგ ოთხ ჩაწერაზე ვიყავი ზედიზედ. ვლაპარაკობდით, ორივეს გვქონდა იდეა, გაგვეკეთებინა ორი ან სამი მიშას ნომერი. მთვრალი და ფხიზელი მიშა, ან - გაბრაზებული და მხიარული. მოკლედ, უკვე თანამშრომლობას ვგეგმავდით. მერე სოფელში წავედი. იქიდან ხშირად ვუყურებდი, გადაცემის შემდეგ ვურეკავდი, კომპლიმენტებს ვეუბნებოდი, მერე აღარ დამირეკავს და არც თვითონ შემხმიანებია.
„მარტო მერაბიშვილთან კი არა, ხადურთანაც ვიყავი წვეულებაზე...“
- ვანო, როდის დაიძაბა შენსა და გიორგის შორის ურთიერთობა?
ვანო ჯავახიშვილი: - გიორგის ყოველთვის ერთ-ერთ ახლო მეგობრად ვთვლიდი. შელაპარაკებაც არ მქონია მასთან. ძალიან ეჭვიანი ადამიანია, ამის გამო თავის გუნდშიც ჰქონდა კონფლიქტი. ერთ-ერთი თანამშრომელი შეთქმულების ბრალდებით გაუშვა სამსახურიდან. გავღიზიანდი, რომ გიორგის ამბიციები გაუჩნდა „თქვენი შოუს“ კუთხით, რომელიც ჩვენი ჯგუფის გაკეთებული გადაცემაა. გიორგიმ თქვა, რომ ეს მისი იყო, რაზეც თვალები დავხუჭეთ და ცალკე გავუშვით. ეს მეწყინა მისგან, როგორც მეგობრისგან, და აღარ ველაპარაკებოდი.
- მის წასვლას შენი მხრიდან პრეზიდენტის პაროდიის დაბლოკვა წინ არ უძღოდა?
- სისულელეა, ეს თვითონ თქვა. რა გამოდის, ვუკრძალავდი პაროდიის გაკეთებას და ამაში ხელფასს ვუხდიდი? ჯერ ერთი, აქ გუნდი წყვეტს ყველაფერს და არა ერთი ადამიანი.
- ნაცმოძრაობასთან მეგობრობაში ადანაშაულებენ თქვენს გუნდს...
- ძალიან ბევრი მეგობარი მყავს. შემიძლია დაგისახელოთ ისინი: ზვიად ძიძიგური, ეკა ბესელია, ნოდარ ხადური, ნაცმოძრაობის ლიდერებიც, მაგრამ ეს გადაცემის ცენზურაზე არასდროს ასახულა.
- არც თვითცენზურაზე?
- არც თვითცენზურაზე, თუმცა უმჯობესია რესპონდენტებთან არ იმეგობრო, რადგან შესაძლოა ვერ ასცდე თვითცენზურას... მაგრამ ჩვენ გვყავს სცენარისტთა გუნდი, რომელთათვისაც არასდროს მიმითითებია, ვისზე უნდა ეხუმრათ და ვისზე - არა. შემიძლია დავიფიცო ყველა, რომ ჩემი გადაცემის სარედაქციო პოლიტიკაში არავინ ჩარეულა. გადახედეთ, რამდენი ხუმრობა მქონდა ნაცმოძრაობაზე, პირადად პრეზიდენტზე, ვისი აგორებულია ფრაზები: „ბანერზე გახსნილი ქარხნები“, „ლაზიკა აბსურდული ქალაქი“. გაიხსენეთ, რამდენს ვხუმრობდით საავადმყოფოების გახსნაზე და მსახიობ ავადმყოფებზე.
- ასეთი ხუმრობები პრობლემას არ გიქმნიდა ვანო მერაბიშვილთან მეგობრობაში?
- არა, რატომ უნდა შემქმნოდა? რაც შეეხება ვანო მერაბიშვილს, ჩვენ გადაცემებთან დაკავშირებით გვაქვს შეხება...
- მის დაბადების დღეზე არ ყოფილხარ?
- ვიყავი, რა მოხდა მერე?! ხადურთანაც ვიყავი ერთ-ერთ წვეულებაზე, რა მოხდა მერე?
- რა აჩუქეთ ვანო მერაბიშვილს?
- კონიაკი. რა დაშავდა ამით?! შენ რომ დაგპატიჟოს რესპონდენტმა დაბადების დღეზე, არ მიხვალ?
- დამპატიჟე და გაიგებ... ხელფასზეც მინდა გკითხო... 14- ჯერ მეტი ხელფასი გქონდა თემო მჟავიასთან შედარებით?
- მან კანონი დაარღვია, როცა ჩემი ხელფასის ოდენობა გააჟღერა. ამის გამო შემიძლია სასამართლოში ვუჩივლო. ეს ერთი, მეორეც, დღეს ძალიან მარტივია შემოსავლების გადა-მოწმება, გადაამოწმეთ და დარწმუნდებით, რომ 14-ჯერ კი არა, 3-4-ჯერ მეტიც არ მაქვს მჟავიას უწინდელ ხელფასთან შედარებით.
- ბაკურ სვანიძეზეც მინდა გკითხო, რამდენიმე დღის წინ თქვენს გუნდს საკმაოდ მძიმე ბრალდებები წაუყენა...
- ისტერიულად დაიწყეს ჩვენს გუნდზე შემოტევა, ეს დაკვეთას ჰგავს. ერთბაშად ორი ასეთი შემოტევა მთლად დამთხვევა არ უნდა იყოს. მე რომ დღეს ვთქვა, ბაკურ სვანიძე ჩვენთან მუშაობის პერიოდში ადამიანებს ქვებს ურტყამდა თავშიო, დაიჯერებთ? ნაძირალები ვყოფილვართ თურმე, 7 ნოემბერს სპეცრაზმს მოვუწოდებდით, ხალხი ჩახოცეთო. რა სისულელეა! იმ პერიოდში მთელმა არხმა სოლიდარობა გამოვუცხადეთ „იმედს“. ჩვენი თანამშრომლები აქციაზე იყვნენ მისულები. ჩვენი მეგობრები მუშაობდნენ იმ ტელევიზიაში და გული შეგვტკიოდა მათზე. მის სინდისზე იყოს ეს ამორალური განცხადებები. ეს არ არის კაცის ნალაპარაკევი, ის კაცი არ არის, ბაკურ სვანიძის მოქმედებას კაცობა არ ჰქვია.
- სვანიძე აფციაურსაც ადანაშაულებს ამ ყველაფერში, შენ კი შეთქმულებაზე ლაპარაკობ...
- არ ვიცი, რა აქვთ დაგეგმილი. შავი პიარი რომ დაწყებულია, ფაქტია. ბრძოლა გამოგვიცხადეს. შემოქმედებითად ვერ გვებრძვიან და ამ სამარცხვინო ჭორებით გვიტევენ.
- რატომ წავიდა ბაკური თქვენგან?
- მთელი გუნდის პროდიუსერი ვიყავიო, რომ ამბობს, იტყუება. ის იყო სამეურნეო რგოლის ხელმძღვანელი, ხუთი კაცი ებარა, ადამიანები, რომლებიც სკეტჩის დროს ინტერიერის აწყობას უზრუნველყოფდნენ, შპალერის გაკვრას, ჭანჭიკის მორგებას. ამ ხუთ კაცსაც ვერ აქცევდა ყურადღებას. ინტერნეტში იჯდა სულ, ლექსებს წერდა. პოეტია. უკაცრავად, მთლად გალაკტიონი ვერ არის, მაგრამ წერდა. სამჯერ მივეცით შენიშვნა ამაზე. ის ჩვენგან 7 ნოემბრის შემდეგ არ წასულა. მას მერე კიდევ რამდენიმე თვე იმუშავა. საახალწლო კონცერტებს რომ ვამზა-დებდით, უპასუხისმგებლოდ მოიქცა, ვერ ასრულებდა თავის მოვალეობას. მაგალითად, სალაროში ბილეთები აღარ იყო, ის კი კომპიუტერთან იჯდა და თამაშობდა. შენიშვნა მივეცით, მან ერთ-ერთ ჩვენს თანამშრომელზე გამოიწია, გაარტყა. ამის მერე გავათავისუფლეთ სამსახურიდან. ეს იყო რეალური მიზეზი და არა ის, რომ მან პროტესტის ნიშნად დატოვა არხი. ჩემი ოჯახის ყველა წევრი შემიძლია დავიფიცო, რომ ბაკურ სვანიძეს პროტესტის ნიშნად არ დაუტოვებია სამსახური.
„მე ხომ არ დავარბიე ეს ხალხი?!“
იუმორისტთა დაპირისპირების კიდევ ერთი მთავარი გმირი ნიკა გრიგოლია გახლავთ, რომელსაც ტელეფონით დავუკავშირდით. - ნიკა, ინციდენტის შესახებ მინდა გკითხო, აფციაურმა თქვა, რომ ფიზიკურად გაგისწორდ-ნენ, მალხაზიშვილმა - ქვისლებმა იჩხუბესო, შენი ვერსია როგორია?
- ცემას იმას ვეძახი, ხუთი კაცი რომ გირტყამს, ორი მაინც. ეს არ ყოფილა, ვერ მოგატყუებ, მაგრამ ყველაზე მეტად რაც მწყინს, ის არის, რომ ამას ქვისლების კამათს არქმევენ, ოჯახურ და ნათესაურ ჭრილში განიხილავენ. ქვისლები საქმეს სამუშაო ოთახში არ არჩევენ. კამათი იყო სამსახურიდან ჩემი დათხოვნის გამო, პასუხს ვითხოვდი ყველასგან. ამას მოჰყვა ეს ინციდენტი. ჩვენ არ ვლაპარაკობდით იქ, როგორც ქვისლები, ვკამათობდით, როგორც თანამშრომლები.
- ადასტურებ, რომ მიშა ანდღულაძემ დაგარტყა?
- შეხლა-შემოხლა მოგვივიდა მე და მიშას. დეტალებზე ლაპარაკი არ მინდა. დანარჩენებმა გაგვაშველეს. აბა, ფსონებს ხომ არ დადებდნენ, რომელი მოერევითო?
- ბაკურ სვანიძის ბრალდებებს როგორ უპასუხებ?
- ბაკურთან კონფლიქტი არასდროს მქონია. ჩემი პირველი რეაქცია იყო გაკვირვება. სიმართლე გითხრათ, მეწყინა კიდეც, „კომედი ჯგუფიდან“ რომ წავიდა. მისი არგუმენტებიც მაკვირვებს, რომ შეშფოთებულია, რაც ქვეყანაში ხდება და ამიტომ გამოვიდა საჯაროდ. ვერ ვიგებ, რატომ მაკავშირებს იმ ადამიანთან, რომელთანაც საერთო არასდროს არაფერი მქონია, გვარი გამიგია მხოლოდ, ისევე როგორც თქვენ.
- ვაზაგაშვილს გულისხმობ?
- ჰო. მკვლელობა საზიზღრობაა, არა აქვს მნიშვნელობა, მსხვერპლი დამნაშავეა თუ არა. ბაკური თუ იმისთვის აგორებს ამ ამბავს, დაამტკიცოს, რა ევროპულად აზროვნებს თვითონ და ჩვენ - არა, სისულელეა ეს ყველაფერი. თუ ჩვენ „ჩახოცეთო“ ვიძახეთ აქციის მონაწილეებზე, ის კი არ უნდა ეთქვა, თქვენ ევროპულად არ აზროვნებთო, უნდა მოსულიყო და ეთქვა, „თქვენ შიგ ხომ არა გაქვთ, რეებს ამბობთო“. სასაცილოა მისი განცხადებები და ტყუილია.
- რატომ იტყუება ბაკური, რა მიზანი აქვს?
- არ ვიცი. ძალიან აღელვებული იყო, ეტყობა, რაღაც თემაზე გაცხარდა და დაფრთხა, გაექცა სიტყვები. საინტერესოა, იმ 7 ნოემბერს მეც ხომ არ ვიყავი ერთ-ერთი ნიღბიანი. მე ხომ არ დავარბიე ეს ხალხი?! ჩემი ძმა იყო იმ აქციაზე პარლამენტის მიმდებარე ტერიტორიაზე და სცემეს, ფიცარი გადაამტვრიეს ჩემს ძმას. თურმე ამ დროს ვიდექი და სპეცრაზმს შევძახოდი, მიდი, დასცხეთ ბიჭებო, თავები გაუჩეჩქვეთ-მეთქი. მაგრად მწყინს ბაკურისგან ეს ტყუილები. არ ვიცი, რისთვის სჭირდება, მაგრამ რისთვისაც უნდა სჭირდებოდეს, საზიზღრობაა დაღუპული ადამიანების გვარებით მანიპულირება. ვერ დამაჯერებს ბაკური, რომ ქვეყანაში მიმდინარე პროცესებით შეშფოთებული ლაპარაკობს ამ ყველაფერზე.
„ჩემი წამოსვლის შემდეგ ჩაუსასტავდნენ მინისტრებს“
გასულ კვირას გიორგი აფციაურის მიერ გაკეთებული განცხადებების პარალელურად, „კომედი შოუს“ მიმართ ბრალდებებით მათი ერთ-ერთი ყოფილი თანამშრომელი ბაკურ სვანიძეც გააქტიურდა. სვანიძე ადრე „რუსთავი 2“-ზე პროექტს „გაიღიმეთ, ფარული კამერაა“ აკეთებდა. აფციაურის პრესკონფერენციის შემდეგ ბაკურ სვანიძემ „ფეისბუქის“ საკუთარ გვერდზე შემდეგი შინაარსის სტატუსი გამოაქვეყნა:
„ზურა ვაზაგაშვილიც მისახვრეტი იყო, გირგვლიანი მოსაკლავი! „იმედის“ თანამშრომლები არ უნდა გამოეშვა სპეცნაზს იქიდან ცოცხლები! და 2007 წლის ნოემბერში თავ-პირი უფრო მაგრად უნდა დაემტვრიათ ხალხისთვის და დაესისხლიანებინათ!“ - იცი ვისი სიტყვებია ეს?“
ამ სტატუსზე და „კომედი შოუს“ ბიჭებთან ძველ მეგობრობაზე ბაკურ სვანიძეს ვესაუბრეთ.
- რამდენი ხანი მუშაობდით „რუსთავი 2“-ზე? - 2004-2007 წლებში, 2006 წელს „რუსთავი 2“-ზე არსებული ყველა გასართობი გადაცემის მთავარ პროდიუსერად დავინიშნე. ეს ის პერიოდი იყო, როცა დათო გოგიჩაიშვილი არხიდან წავიდა. იმ პერიოდში „საზოგადოებრივ არხზე“ გასართობი გადაცემების მთავარ პროდიუსერად ვმუშაობდი. როდესაც კობა დავარაშვილი „რუსთავი 2“-ის დირექტორად დაინიშნა, დათო გოგიჩაიშვილმა და მე ვერ გავუგეთ ერთმანეთს. დათოსთან შევედი, ჩემი პრეტენზიების შესახებ ვუთხარი, მიმაჩნდა, ჩემ მიმართ სწორად არ იქცეოდა. ვისაუბრეთ, მან მითხრა, რომ რაღაცებში არ მეთანხმებოდა და ისიც მითხრა, იქნებ თავი შემეკავებინა წასვლისგან, მაგრამ „საზოგადოებრივ არხზე“ გადავედი.
- ამის შემდეგ მოხდა დაპირისპირება „რუსთავი 2“-ში?
- გოგიჩაიშვილის გუნდში მოხდა შიდა განხეთქილება, რაზეც დათო ჯერ კიდევ მაშინ გავაფრთხილე, როცა მივდიოდი, რომ გუნდში საქმე კარგად არ ჰქონდა. მას შემდეგ, რაც გოგიჩაიშვილი არხიდან წავიდა, ალეკო მალხაზიშვილმა და გოჩა თანდარაშვილმა სახლში მომაკითხეს, დარჩენილი ხალხის მართვა ჰქონდათ ხელში აღებული. ძალიან დაბნეულები იყვნენ. მითხრეს, რომ არ იცოდნენ სტრუქტურის აწყობა. გარკვეული პირობების შემოთავაზების შემდეგ მთავარ პროდიუსერად დავბრუნდი. რა სტრუქტურაც შემდეგ აეწყო, ჩემი გაკეთებულია. 2007 წლის მარტში თუ აპრილში მივედი და დეკემბერში წამოვედი.
- რა მიზეზით დატოვე არხი?
- პირდაპირ გეტყვით, მიზეზი იყო 2007 წლის 7 ნოემბერი. როდესაც ძალიან დიდი პროტესტი გამოვთქვი იმის მიმართ, რაც მოხდა. აქ არაფერ შუაშია პოლიტიკა. ის, რაც 7 ნოემბერს მოხდა, იყო მორალის და ზნეობის ამბავი.
- რამ გაგაღიზიანა ამ კონკრეტულ შემთხვევაში?
- 7 ნოემბერს რაც მოხდა, ყველა ერთად ვუყურებდით სამსახურში ტელევიზორში. ამ დროს ნორმალურ ადამიანს, მიუხედავად პოლიტიკური კუთვნილებისა, ცუდი რეაქცია უნდა ჰქონოდა. ადამიანურად აღვშფოთდი, ჩემდა გასაოცრად, ოთახში მყოფი იუმორისტებისგან სასწაული აგრესია წამოვიდა ჩემი მისამართით. მხოლოდ სამ გამონაკლისს გეტყვით, დათო გოგიშვილი-ციყვი, დეკორატორი გუჯა ტომარაძე და ვანო ჯავახიშვილის ძმა კახა ჯავახიშვილი. იძახდნენ, აბა, რა უნდა უქნან, არ უნდა მოკლან? არ უნდა დახოცონ? ველურებივით წამოხტნენ და ჩახოცეთ, მაგათი დედაო, - იძახდნენ.
- იყვნენ თუ არა იმ დროს იქ გიორგი აფციაური და ნიკა გრიგოლია?
- დიახ, იყვნენ. ფაქოც იყო, ამიკოც. ფაქო განსაკუთრებული აგრესიით გამოირჩეოდა. შემდეგ უკვე მე იქ აღარ ვმუშაობდი, მაგრამ როდესაც პირველი განცხადება გააკეთა ბიძინა ივანიშვილმა, ჯერ კიდევ გარკვეული შეხება მქონდა ამ ხალხთან და უშვერი სიტყვებით აგინებდნენ ივანიშვილს.
- ფაქო აგინებდა?
- არც უმაგისობა იყო... ყველას მხრიდან მოდიოდა გინება.
- რა ფორმით დატოვეთ არხი?
- იმ დღეს მათ მივუბრუნდი და ვუთხარი, გრეჩიხა და მიშა არ მაინტერესებს, პოლიტიკის დედაც, თქვენ ხართ არაადამიანები, მორალური და ზნეობრივი უფლება არ გაქვთ, რომ მაყურებელს ეთერში იუმორს აწვდიდეთ-მეთქი. მიპასუხეს, შენ ასე გააგრძელე და ვინ მოგცემს იმ დოლარებს, ახლა რომ გაძლევენ, მერე ვნახავთო. ეს სიტყვები ოთო ლომთაძემ მითხრა. საღამოს ტელეკომპანია „იმედში“ სპეცრაზმი შევარდა. საშინელი კადრები იყო, როგორ ურტყამდნენ „იმედზე“ ჩვენს კოლეგებს. ვიფიქრე, რომ კოლეგები მაინც შეეცოდებოდათ. მე „იმედელებთან“ დაკავშირებას ვცდილობდი, ისინი კიდევ ჩემთან ოთახში შემოდიოდნენ და დამცინოდნენ, რა განერვიულებს, ნუ გამოუშვიათ ცოცხლებიო.
- ვინ ამბობდა ამ სიტყვებს?
- ნიკა გრიგოლია, ალეკო მალხაზიშვილი, ვანო ჯავახიშვილი, მიშა ანდღულაძე, გოჩა თანდარაშვილი, გავაგრძელო კიდევ? გიორგი აფციაურიც იმავე აზრზე იყო, შემიძლია დავადასტურო.
- შენს სტატუსში დაწერილი სიტყვები ნიკა გრიგოლიას ეკუთვნის?
- ეგ სიტყვები, რაც მე სტატუსად დავწერე, რამდენიმე ფრაზის გაერთიანებაა. ერთი ნაწილი ეკუთვნის ნიკა გრიგოლიას, ის, რომ ვაზაგაშვილი იყო დასახვრეტი. ეს პირადად მე მითხრა ნიკა გრიგოლიამ. 7 ნოემბერის საღამოს ყველას ვაგინე კოლექტიურად. ამის მოწმეები არიან ლაშა ბუღაძე, რატი ამაღლობელი და ბასა ჯანიკაშვილი. მაშინ ჩვენს თავზე რადიო „უცნობი“ იყო, აღარ შემეძლო ამ არაადამიანობაში გაჩერება და მათთან ავედი. ვთხოვე, იქ ვყოფილიყავი, თორემ საშინელება მოხდებოდა. ორი საათი ბასას ოთახში ვიჯექი, სადაც ბუღაძე და ამაღლობელიც იყვნენ.
- შემდეგ რა მოხდა?
- მუშაობა გავაგრძელე, მაგრამ ჩემ მიმართ დიდი აგრესია წამოვიდა. პატარა რაღაცაც რომ გაფუჭებულიყო, ყველაფერი მე მბრალდებოდა.
- ალეკო მალხაზიშვილი იმ დროს რა პოზიციაზე იყო?
- მისი ფრაზაა, „იმედის“ თანამშრომლები ნუ გამოუშვიათ ცოცხლები, მაგათი დედაცო... და ეს „იმედის“ მაშინდელმა დირექტორმა ბიძინა ბარათაშვილმა იცის, 2008 წელს ვუთხარი. მას მერე თვე-ნახევარი ვიმუშავე და ეს იყო ჯოჯოხეთი. აგრესია დაგროვდა და ბოლოს ჩემი და გოჩა თანდარაშვილის ჩხუბით დამთავრდა. წიხლქვეშ არ გაგვიგდია ერთმანეთი, მაგრამ იყო გაქაჩვა, გაკავება, წარტყმა-წამორტყმა. ყველა აჰყვა ამ აგრესიას ჩემ წინააღმდეგ, მაგრამ ფაქტია, რომ ამის პროვოცირება გოჩამ მოახდინა. მას ყველაზე აგრესიულად აჰყვა მიშა ანდღულაძე. რაც შეეხება ალეკო მალხაზიშვილს, მან შეკრიბა ეს ხალხი, დაიწყო განხილვა და როგორც კი სიტუაცია დაიძაბა, გაქრა, უბრალოდ, გაიპარა, რომ რაღაცები თავიდან აერიდებინა. ამაზე მას უკვე ველაპარაკე და შესაბამისი ურთიერთობა გვაქვს დღეს მე და ალეკო მალხაზიშვილს. იმ დღის შემდეგ დავტოვე არხი, დამოუკიდებელი სტუდია შევქმენი და „ფარული კამერის“ წარმოება დავიწყე „პირველ სტერეოსა“ და „მზეზე“. იმ პერიოდში მირეკავდნენ ჩვენი ძვირფასი იუმორისტები და მეუბნებოდნენ, რომ მშიერს დამტოვებდნენ, ჩამწიხლავდნენ.
- ძალიან სერიოზულ ბრალდებებს უყენებ ამ ადამიანებს...
- ეს ბრალდებები არ არის. ისინი არიან უზნეო ადამიანები. მათი სამსახურში მიწვევა და ხელფასის გადახდა არ გამიპროტესტებია და არ მაინტერესებს, უბრალოდ, ნუ „აკაიტიპებენ“. ამას შალვა რამიშვილს და დავით აქუბარდიას ვეუბნები. თუ ამ ადამიანებს ეთერში გამოიყვანთ, ჯერ ბოდიში მოახდევინეთ და შემდეგ „აკაიტიპეთ“.
- მოგვიანებით ნიკა გრიგოლიაც გამოუშვეს „რუსთავი 2“-დან და აფციაურმა განაცხადა, რომ ის სცემეს...
- ნიკა გრიგოლია არავის დაუჩაგრავს. საკუთარ თავს დააბრალოს, რომ გამოუშვეს. თქვენ რა გგონიათ, ვინ მოუგვარა გიორგი აფციაურს ის ამბავი, რომ ცალკე გადაცემად გაუშვეს. თავიდან არ უშვებდნენ ცალკე და შემდეგ ვანო მერაბიშვილმა მოუგვარა. სამსახურის წინ „სტაიანკაზე“ კარგი ადგილი იყო, სადაც მანქანის დაყენება უნდოდათ გიორგი აფციაურს და ვასო ფხაკაძეს, ამ თემაზე ვანო მერაბიშვილმა დარეკა და თქვა, რომ იქ მანქანას გიორგი აფციაური დააყენებდა.
- ცოტა სასაცილო ხომ არ არის, რასაც ახლა ამბობ?
- სასაცილო კი არა, ტრაგიკულია. გიორგი აფციაურის და ნიკა გრიგოლიას „გაკაიტიპება“ ვიღაცის დაგეგმილი ოპერაცია მგონია, მაგრამ შედეგად სერიოზულ კრახს მიიღებს, რადგან ამ დროს ყველაზე კარგ ტიპებად მალხაზიშვილი და ჯავახიშვილი გამოჩნდებიან.
- დღეს რას საქმიანობ?
- არაფერს... „ინფო 9“-ს ტექნიკური დირექტორი ვიყავი და ნულიდან ავაწყვე ყველაფერი. წინაასაარჩევნოდ ფრონტზე ვიყავით და დღეს იქ არც ერთი აღარ ვმუშაობთ.
- „რუსთავი 2“-ში შენი მუშაო¬ბის დროს თუ ყოფილა მაშინდელი ხელისუფლების მხრიდან დირექტივები?
- დირექტივები იყო, მაგრამ ეს ბიჭები ჩემი წამოსვლის შემდეგ ჩაუსასტავდნენ მინისტრებს და სხვა მაღალჩინოსნებს. მანამდე „რუსთავი 2“-ის ხელმძღვანელობიდან მოდიოდა დირექტივები, მათ კი ამ დირექტივებს ვინ აძლევდა, რთული გამოსაცნობი არ არის. მაშინდელი დირექტორი ირაკლი ჩიქოვანი პირდაპირ რეკავდა და ამბობდა, რომელი ადამიანი არ უნდა გამოსულიყო ეთერში, ან კაბინეტში იძლეოდა დირექტივებს, რომელი თემა უნდა გაეუფასურებინათ. ამაზე პროტესტის გრძნობა მქონდა და ამ ყველაფერმა რა შედეგიც გამოიღო, ვნახეთ.
ნინო მჭედლიშვილი
ნინო გიგიშვილი
ჟურნალი „რეიტინგი“
