თაფლის სასარგებლო თვისებები ფართოდაა ცნობილი. თუმცა იშვიათად ლაპარაკობენ ფიჭის თაფლზე, რომლის სიკეთეს ყველა დროში აფასებდნენ. ჯერ კიდევ უძველეს დროში მიაჩნდათ, რომ ფიჭის თაფლს განსაკუთრებული სამკურნალო ძალა აქვს.

როგორ გამოვიყენოთ სამკურნალოდ
ფიჭის თაფლის ღეჭვა რეკომენდებულია მათთვის, ვისაც პირის ღრუს ანთებითი პროცესები აწუხებს: კარიესი, ღეძილების ანთება, სტომატიტი. ფიჭის ღეჭვის დროს დეზინფიცირდება პირის ღრუ და კბილები ნადებისგან სუფთავდება.

კუჭისა და ნაწლავების გასასუფთავებლად, ასევე, გულმოდგინედ უნდა დაღეჭოთ ფიჭა, შემდეგ კი ფიჭის პატარა ბურთულებიც შეგიძლიათ გადაყლაპოთ. ფიჭა დადებითად მოქმედებს კუჭის სეკრეციულ და მამოძრავებელ ფუნქციაზე. გარდა ამისა, აბალანსებს კუჭის სეკრეციის მჟავიანობას.

დაკვირვებამ აჩვენა, რომ მჟავიანობა კლებულობს, თუ ფიჭას ჭამამდე 1,5-2 საათით ადრე შეჭამთ და მოიმატებს, თუ უშუალოდ ჭამის წინ მიიღებთ.

ხშირად ფიჭის სტერილურ თაფლს კატარაქტის პროფილაქტიკისა და მკურნალობისთვის იყენებენ. მას ანადუღარი წყლით აზავებენ და თვალებში იწვეთებენ. თუ ამ მეთოდის გამოყენებას გადაწყვეტთ, აუცილებლად მიმართეთ მკურნალ ექიმს, გამოყენების წესსა და დოზას ის დაგიდგენთ.

თაფლის ფიჭას იყენებენ, აგრეთვე, სასუნთქი გზების მკურნალობისა და პროფილაქტიკისთვის.

ფიჭის თაფლი ძალიან კარგია იმუნიტეტის გასაძლიერებლად. და საერთოდ, ფიჭის თაფლი ძალიან სასარგებლოა ჯანმრთელობისთვის.

ფიჭის თაფლი განსაკუთრებით სასარგებლოა მზარდი ორგანიზმისთვის. მისი რეგულარულად გამოყენებისას ბავშვები იშვიათად ავადმყოფობენ და უფრო ძლიერები და ჯანმრთელები იზრდებიან.

გაითვალისწინეთ: მიუხედავად სასიკეთო თვისებებისა, ბევრი თაფლის ჭამა არ შეიძლება. შეგიძლიათ მიირთვათ დღეში 1-3-ჯერ სუფთა სახით ან შავ პურთან ერთად.

სოფიო ბულაური