სიზარმაცე ვარჯიშის პირველი მტერია თეორიულად ყველამ იცის, ვარჯიში აუცილებელია ჯანმრთელობისთვის. სინამდვილში ეს ნამდვილად ასეა, ვარჯიში აჩქარებს ნივთიერებათა ცვლას და სისხლის მიმოქცევას, ეს აისახება ტვინზე, ადამიანი სხარტად აზროვნებს, უმჯობესდება მეხსიერება, ადვილად პოულობს გამოსავალს სირთულეებიდან, თავში მოსდის კრეატიული იდეები, რაც პროფესიულ წინსვლაში უწყობს ხელს, ეხსნება სტრესი, გვიან უბერდება კანი, ურეგულირდება მადა, ხდება დისციპლინირებული, უწესრიგდება ძილის ციკლი, მენსტრუაცია და სექსუალური ცხოვრება, დაზღვეულია ხერხემლის პრობლემებისგან.

ინსტრუქტორი მიხეილ (მიშა) ანდღულაძე 35 წლისაა და კარგად იცნობს ვარჯიშის საიდუმლოებებს. მას ''ასპრიაში'' მივაკითხეთ და ცხოვრების ჯანსაღ წესზე, ასევე სხეულის პრობლემური ზონებისთვის განკუთვნილ ვარჯიშებზე ვესაუბრეთ.



სიზარმაცე ვარჯიშის პირველი მტერია. შეიძლება ადამიანი ჭარბწონიანი იყოს, მაგრამ ფორმაში ჩადგომაზე არ ზრუნავდეს, იმიტომ, რომ ეზარება. იმისთვის, რომ სიზარმაცეს მოერიოთ:

1. შექმენით მუსიკალური კრებული

თუ თქვენ არ გყავთ პირადი ინსტრუქტორი, რომელიც თავზე დაგადგებათ და გაიძულებთ 50-ჯერ გააკეთოთ მუცლის პრესი, დაგჭირდებათ კარგი მუსიკით სავსე მობილური ან ''აი-პადი''. მასში ჩაწერეთ აქტიური სიმღერები: როკი, პოპი, ჰიპ-ჰოპი ან ტექნო. ასე ვარჯიში გართობად გადაიქცევა.

2. აიყოლიეთ მეგობარი

მეგობართან ერთად ვარჯიში უფრო სახალისოა, ვიდრე მარტო, ამიტომ აიყოლიეთ რომელიმე მეგობარი და ერთად ივარჯიშეთ. შეგიძლიათ ერთმანეთს შეეჯიბროთ კიდეც. ჯანსაღი კონკურენცია ყოველთვის სასარგებლოა.

3. დაისახეთ რეალური მიზნები

იმისთვის, რომ იმედი არ გაგიცრუვდეთ, ვარჯიშის შემდეგ შედეგი უნდა დაინახოთ. შედეგს ყოველ 2-3 თვეში მიიღებთ, მაგრამ ნუ ააგებთ ოცნების კოშკებს. შეუძლებელია მოკლე პერიოდში ჰოლივუდის ვარსკვლავის ან მოდელის ფიგურის მიღება.

4. მოტივაცია

ხშირ შემთხვევაში ადამიანები მაშინ ზარმაცობენ, როცა მოტივაცია არ აქვთ. მოტივაცია შეიძლება იყოს სიყვარული, კარიერული წინსვლის სურვილი, თვითშეფასების ამაღლება... დადექით სარკის წინ და გადაიღეთ სურათი საცვლებში, 3-თვიანი ვარჯიშის

შემდეგ გაიმეორეთ იგივე და შეადარეთ პირველ ფოტოს.

კვება

სიტყვა ''დიეტა'' არ მიყვარს, რადგან ის ხალხისთვის საკვების გრამებში მიღებასთან ასოცირდება. აუცილებელი არ არის ლუკმები დაითვალოთ, უბრალოდ, სუფრიდან არ ადგეთ სავსე კუჭით, გქონდეთ ისეთი შეგრძნება, რომ კიდევ შეჭამდით ისეთივე პორციას. საღამოს შვიდი საათის მერე ხორცეულსა და ხილს მოერიდეთ
და გადაერთეთ რძის პროდუქტებზე ან ბოსტნეულზე.

ვარჯიშამდე მიირთვით:

ბანანი (ვარჯიშამდე 30 წუთით ადრე)
ბანანი შეიცავს ნახშირწყლებს, რომელსაც ორგანიზმი ადვილად ითვისებს, ასევე - კალიუმს,
რომელიც კვებავს და აძლიერებს ნერვებსა და კუნთებს.
იოგურტი (40 წუთით ადრე)
თუ სირბილს აპირებთ, აუცილებლად მიირთვით
იოგურტი. დარწმუნდით, რომ იგი დამზადებულია გამხმარ ხილზე. გამხმარი ხილი შეიცავს საჭირო შაქარს, რაც არეგულირებს ინსულინის დონეს.



ვარჯიშის შემდეგ:

მოხარშული ქათამი ბოსტნეულით ვარჯიშის შემდეგ დაღლილი ხართ, ორგანიზმს
სჭირდება ხორცი და ბოსტნეული.

ომლეტი სოკოთი

კვერცხი ცილა შეუდარებელი რესურსია! სოკო შეიცავს ვიტამინ D-სა და B-ს, რკინას, აძლიერებს იმუნიტეტს, არის ანტივირუსული საშუალება, ორგანიზმიდან გამოდევნის ანტიოქსიდანტებს, აჩქარებს მეტაბოლიზმს, შარდის ბუშტს იცავს დაზიანებისგან.
შეცდომები, რომლებსაც ხშირად უშვებენ...

1. შიმშილობენ და წონაში ავადმყოფურად იკლებენ. შემდეგ საკვებს მიეძალებიან და ორმაგად იმატებენ.

2. როცა მამაკაცები სპორტსა და ვარჯიშს თავს ანებებენ, სასმელსა და ცხიმიან საკვებს ეტანებიან. ბუნებრივია, ფორმასაც მალე კარგავენ. ისინი ავრცელებენ მითს, თითქოს ვარჯიშისთვის თავის დანებების შემთხვევაში სხეული მახინჯდება. სინამდვილეში კი სწორი კვების დროს ყოველ დილით 15-20 წუთით სირბილიც საკმარისია წონის შესანარჩუნებლად.

3. ინტერნეტსაიტებზე ნანახ რთულ ვარჯიშებს დარბაზში აკეთებენ და კუნთებს იზიანებენ.

4. პირველივე კვირაში ძალიან იტვირთავენ თავს. დაიწყეთ 15-წუთიანი ვარჯიშით და ნელ-ნელა გაზარდეთ ვარჯიშის დრო ორ საათამდე



ყველაზე პოპულარული ვარჯიშები და ტრენაჟორები

ვარჯიში საჯდომისთვის საღამოობით უკანალის კუნთებისთვის განკუთვნილი არც ერთი ტრენაჟორი არ არის თავისუფალი. ქალები თავს არ ზოგავენ ლამაზი ფორმის საჯდომის მისაღწევად.

ვარჯიში მკლავებისთვის ასაკის მატებასთან ერთად მკლავები რბილდება, დუნდება და სუქდება. იმისთვის, რომ მკლავის ქვედა ნაწილი არ ჩამოგეწელოთ, აუცილებლად უნდა ავარჯიშოთ.

ვარჯიში ფეხებისთვის
ფოტოზე მოცემულ ტრენაჟორზე იტვირთება როგორც ბარძაყი, ასევე წვივი. ტონუსში მოყვანილი ფეხები უფრო მიმზიდველი და სექსუალურია.



ზურგი
ზურგის ვარჯიში კურნავს ხერხემლის ანომალიებს.

ვარჯიში მკერდისთვის
არსებობს მცდარი მოსაზრება, რომ მკერდის ვარჯიშები მას მოცულობაში ზრდის. ლიმფური ჯირკვლების გარდა, მკერდი შედგება ცხიმისგან. ვარჯიშისას ცხიმი იკლებს.

ვარჯიში მუცლის კუნთებისთვის
მუცელი ძირითად 2 ზონად: ზედა და ქვედა ნაწილებად შეიძლება გავყოთ. პრესის დასაყენებლად ვტვირთავთ როგორც ორივე ძირითად, ასევე მათ ქვედანაყოფებს, გვერდებს.

თათული ღვინიანიძე
ჟურნალი ''რეიტინგი''