''პრეზიდენტში'' 50-მდე ქართველი მსახიობია დაკავებული. მთავარ როლებს მსახიობი მიშა გომიაშვილი და დამწყები მსახიობი დაჩი ორველაშვილი თამაშობენ. ფილში ასევე დაკავებული არიან გუჯა ბურდული, ია სუხიტაშვილი, ჯაბა კილაძე, გია როინიშვილი.
წელს ''პრეზიდენტით'' გაიხსნა ვენეციის კინოფესტივალი, სადაც საპატიო სტუმრებად საქართველოდან
გადაღებები თებერვალში დაიწყო და რამდენიმე თვეს მიმდინარეობდა. მსახიობები მუშაობას დილას ექვს საათზე იწყებდნენ და გვიან ღამე ამთავრებდნენ. მათ შორის იყო 7 წლის დაჩიც, რომელმაც პრეზიდენტის შვილიშვილის როლი ითამაშა.
დაჩი ''იმედის'' ჟურნალისტ ნათია ორველაშვილის ძმაა. როდესაც პატარა მსახიობთან ინტერვიუს ჩაწერა გადავწყვიტეთ, დახმარება ნათიას ვთხოვეთ, რადგან ვერ წარმოვიდგენდით, რომ 7 წლის ბიჭუნა, მსახიობობასთან ერთად, პოლიტიკური ექსპერტის როლსაც შეითავსებდა.
- ნათია, როგორც ვიცი, დაჩის სამსახიობო კარიერის განვითარებაში უდიდესი წვლილი შენ მიგიძღვის.
- თავიდანვე ძალიან არტისტული ბავშვი იყო, ხშირად ვუღებდი საოჯახო ვიდეოებს და შემდეგ სოციალურ ქსელში ვაქვეყნებდი ან ''იუთუბზე'' ვტვირთავდი. დაჩი პატარა იყო, მაგრამ თავის ვიდეოებზე ხალხის აზრი ყოველთვის აინტერესებდა. მეკითხებოდა, ვინ რა დაწერა ჩემზეო.
ერთ დღეს ვიდეოები რეჟისორ ბესო სოლომონაშვილს ვაჩვენე. ვუთხარი, რომ ასეთი ნიჭიერი ძმა მყავდა და თუ ვინმეს დასჭირდებოდა ფილმში გადასაღებად დაჩისნაირი ბავშვი, ეთქვა. ორ კვირაში დამიკავშირდა და მითხრა, რომ საქართველოში ირანელი რეჟისორი მოჰსენ მაჰმალბაფია ჩამოსული და დაჩის ასაკის ბიჭი სჭირდებაო. კასტინგზე მივედით და ძალიან ბევრ ბავშვს შორის აარჩიეს დაჩი. ერთი მინუსი გვქონდა, ინგლისურის მცოდნე პატარა სჭირ-დებოდათ და ამის გამო გახანგრძლივდა მთელი პროცესი, მაგრამ ბოლოს დაჩის ცუდ ინგლისურს დათანხმდნენ (იღიმის). ჩემს ძმას სამსახიობო გამოცდილება არ აქვს, მხოლოდ სკოლის სპექტაკლებში უთამაშია.
დაჩი:
- კასტინგამდე ცოტა ვნერვიულობდი, მაგრამ იქ მისული მივხვდი, რომ ცუდი არ იყო. ვიცეკვე, რაღაცები გავაკეთე. ძალიან მინდოდა, მსახიობი გავმხდარიყავი, რადგან ჩემი მიზანია, რომ დედას კარგი მანქანა ვუყიდო, ჩვენთვის დიდი სახლი ავაშენო და ნათიას, ჩემს დას, შიდა აუზი გავუკეთო სახლში. ძალიან გამიხარდა, როდესაც გავიგე, რომ ფილმზე მე დამამტკიცეს.
ნათია:
- ფილმში ორმოცდაათამდე ქართველი მსახიობია გადაღებული. რაც შეეხება რეჟისორის გადაწყვეტილებას, თუ რატომ აირჩია საქართველო, ჩემი მხრიდან ცოტა უხერხული იქნება, მაგრამ როგორც თავად თქვა, ძალიან მოსწონს ჩვენი ქვეყანა და კინოგარემო. ერთ პატარა ტერიტორიაზე განსხვავებული ლანდშაფტია, რაც მოსახერხებელია გადაღებებისთვის.
- დაჩი, ფილმის შესახებ მოგვიყევი.
- ფილმი პრეზიდენტზეა, რომელიც თავიდან ხალხს ძალიან უყვარდა, მაგრამ შემდეგ ქვეყანაში სინათლეც კი ჩაქრა და გაბრაზდნენ. ერთ დღეს პრეზიდენტი თავის ოჯახთან ერთად ქვეყნიდან მიდის, მაგრამ წასვლა არ უნდა მის შვილიშვილს, არც თვითონ უნდა. გაფრენის ბოლო წუთებში შვილიშვილი უკან გაიქცევა და ბაბუაც გაეკიდება. სასახლეში დაბრუნებულებს ქვეყანაში რევოლუცია დახვდებათ და თავი უნდა გადაირჩინონ. ჩემს გმირს ფილმში დაჩი ჰქვია, ჩემი სახელი და პრეზიდენტსაც დაჩი ჰქვია. გადაღებები სპეციალურად მოწყობილ სასახლეში, აეროპორტში და სხვადასხვა ადგილას მიმდინარეობდა. ჩემი ბაბუის როლი მიშა გომიაშვილმა ითამაშა. ძალიან შევუყვარდი. ერთხელ დაღლილები რომ ვიყავით, ვკითხე, მიშა, გინდა, რომ ფილმს თავი დაანებო-მეთქი, - არ შემიძლიაო.
ნათია:
- ვენეციის კინოფესტივალი ამ ფილმით გაიხსნა და ძალიან კარგი გამოხმაურება ჰქონდა. ოქტომბერში ბუსანის საერთაშორისო ფესტივალზე მიდის. დაჩი ძალიან კარგად მიიღეს ფესტივალზე. მიშასთან ერთად იყო წასული, სამხედრო ფორმა ეცვა (იღიმის).
დაჩი:
- თავიდან პრესკონფერენცია რომ დაიწყო, ცოტა დავიძაბე, მერე ჩემს თავს ვკითხე, რატომ ვიყავი ასე და გამიარა. ფილმის დასრულების შემდეგ ჩემმა დედამ და რეჟისორის ქალიშვილმა ჰანამ დაინახეს, რომ ხალხს თვალზე ცრემლი ჰქონდა. ძალიან კარგად შემხვდნენ, ქუჩაში შეძახილები მესმოდა. ყველა ჩემთან იღებდა ფოტოებს.
- ალბათ გადაღებების დროს ძალიან დაიღალე.
- დილის ექვსი საათიდან მიმდინარეობდა გადაღებები, ვიღლებოდი, მაგრამ ამას პო-პულარობისთვის ვაკეთებდი. კიდევ მინდა, ფილმში გადამიღონ, მაგრამ ახლა საბავშვოსა და მხიარულ, ''ცელქი ბავშვების'' მსგავსში. ფილმი რომ ვნახე, ძალიან მომეწონა, მაგრამ ფინალი ცოტა მძიმე იყო და მიშა შემეცოდა. წინასწარ არ გეტყვით, როგორ მთავრდება (იცინის). ჩემი საოცნებო როლებია ბეტმენი და ჯეიმს ბონდი.
- შენმა კლასელებმა თუ იციან, ფილმში რომ გადაგიღეს?
- რა თქმა უნდა, უხარიათ ძალიან. ამბობენ, დაჩი მოვიდაო. მასწავლებელსაც ძალიან გაუხარდა. აინტერესებთ, თბილისში როდის აჩვენებენო. ექსკლუზიურად გეტყვით, იანვარში შედგება პრემიერა.
- დაჩი, გარდა შენი ოცნებისა, რომ დიდი მსახიობი გამოხვიდე, კიდევ რა გიტაცებს?
- გამომგონებელი ვარ. გამოუსადეგარი ნივთებით ახალ რაღაცებს ვქმნი. წყლის თოფი გამოვიგონე, ბილიარდის კიაზე ბოთლი დავამაგრე რამდენიმეგან გახვრეტილი. ხელს რომ მოუჭერ, შადრევანივით ასხამს.
ნათია:
- ტელეფონის ასაღები ქუდი გამოიგონა. ზედ მაგნიტი დაამაგრა, ხიდზე რომ გადადიხარ, თუ ტელეფონი გადაგივარდა, თავს მიუშვერ და წყალში აღარ ჩავარდებაო (იცინის).
- დაჩი, შენი და ცნობილი ჟურნალისტია, პოლიტიკურ გადაცემებს თუ უყურებ?
- კი. რუსეთი ხომ გვემტერება და მაინტერესებს, რამე ხომ არ დაგვიშავეს, ამიტომ საინფორმაციოში ნათიას ყოველთვის ვუყურებ. ისედაც ვუყურებდი, ნათია რომ არ იყოს, მაინტერესებს პოლიტიკა.
ნათია:
- მართალია, დაჩის იმდენად აიტერესებს პოლიტიკა, რომ ერთი პერიოდი ექსპერტიც კი იყო. საღამოობოთ დავჯდებოდი, სხვადასხვა თემას ვაძლევდი და თავის აზრს გამოთქვამდა.
დაჩი:
- 5 წლის ვიყავი, ექსპერტობა რომ დავიწყე, პოპულარობა მინდოდა, რომ ტელევიზიაში მივეწვიე ვინმეს. სანამ ფილმში გადამიღებდნენ, პოლიტიკოსობა მინდოდა, მაგრამ მსახიობობა უფრო კარგია. შეგიძლია, მილიონერი გახდე.
- ახლა გვითხარი, რას ფიქრობ მიმდინარე პოლიტიკურ მოვლენებზე?
- ჩემი ქვეყანა მიყვარს, ყველაფერი კარგია, მაგრამ ბოდიში და, აუცილებლად უნდა ვთქვა კაზინოებზე. ამდენი რომ ააშენეს, ხალხი ფულს აგებს და ასე უბედურდება ქართული ოჯახები. ფულის წაგების მერე ზოგი გიჟდება, თავს იკლავს. რატომ არ აუქმებენ, ვერ ვიგებ. არ მომწონს, ხალხი ნაგავს რომ ყრის, ვითომ ჯარიმები დააწესეს, მაგრამ მაინც ყრიან. ძალიან ცუდია, სამარშრუტო ტაქსებში რომ ხალხი ფეხზე დგას, შეიძლება, მძღოლმა უცებ დაამუხრუჭოს და ხალხი დაშავდეს. როგორ შეიძლება ასეთი რამე.
- რომელი ქართველი პოლიტიკოსები მოგწონს?
- ბიძინა ივანიშვილი და გიორგი მარგველაშვილი. სხვათა შორის გიორგი მარგველაშვილი და მე ერთად ვისვენებდით და როდესაც დავინახე, მასთან ფოტო გადავიღე. ბიძინა ივანიშვილთან არ მაქვს სურათი გადაღებული, რატომაც არა, მასთანაც სიამოვნებით გადავიღებდი (იცინის).
ნინო გიგიშვილი
ჟურნალი ''რეიტინგი''
